११ जहाल नक्षलवाद्यांचे मुदतपूर्व आत्मसमर्पण
स्पेशल झोनल कमिटी सदस्य विकासचाही समावेश
लोकसत्ता वार्ताहर
गडचिरोली/गोंदिया : नक्षलवादी
संघटनेच्या महाराष्ट्र-मध्यप्रदेश-छत्तीसगड (एमएमसी) विशेष विभागीय समितीच्या ११ जहाल नक्षलवाद्यांनी आज, शुक्रवारी गोंदिया पोलिसांसमोर आत्मसमर्पण केले. यात चळवळीतील महत्त्वाचा नेता तथा स्पेशल झोनल कमिटी सदस्य विकास नागपुरे उर्फ नवज्योत याचाही समावेश आहे. आत्मसमर्पित नक्षल्यांवर महाराष्ट्र शासनाचे एकूण ८९ लाख रुपयांचे बक्षीस होते.
'एमएमसी' समितीचा प्रवक्ता अनंत याने २७ नोव्हेंबरला प्रसिद्धी पत्रक जारी करत १ जानेवारी २०२६ रोजी संपूर्ण समिती आत्मसमर्पण करणार असल्याचे स्पष्ट केले होते. त्यानंतर शुक्रवारी संध्याकाळच्या सुमारास ११ नक्षल्यांनी गोंदिया पोलिसांसमोर शरणागती पत्करली.
सुरक्षा यंत्रणांच्या तीव्र अभियानामुळे मागील वर्षभरात सहा केंद्रीय समिती सदस्य, महासचिव बसवाराजू आणि हिडमासारखे सर्वोच्च नक्षल नेते मारले गेले आहेत. तसेच भूपती, चंद्रन्ना
संपूर्ण 'एमएमसी' समिती शरण येणार
नक्षलवादी संघटनेत दंडकारण्य आणि एमएमसी समितीचे मोठे महत्त्व आहे. मिलिंद तेलतुंबडेनंतर केंद्रीय समिती सदस्य रामधेर यांच्याकडे याचे नेतृत्व आहे. नक्षलवाद्यांनी तीन राज्यांपैकी (महाराष्ट्र, मध्यप्रदेश, छत्तीसगड) कुठल्याही एका मुख्यमंत्र्यांसमोर आम्ही आत्मसमर्पण करणार, अशी अट ठेवली आहे. प्रवक्ता अनंत याने महाराष्ट्र आणि मध्यप्रदेशच्या मुख्यमंत्र्यांनी यावर प्रतिक्रिया द्यावी, असे आवाहनही केले आहे. ११ माओवाद्यांचे आत्मसमर्पण आणि संपूर्ण एमएमसी समितीच्या सामूहिक शरणागतीची घोषणा, यांमुळे नक्षलवादाच्या समाप्तीच्या दिशेने महत्त्वाचे पाऊल पडले असून, आता तीन राज्यांचे प्रमुख यावर काय निर्णय घेतात, याकडे लक्ष लागले आहे.
यांसारख्या वरिष्ठ नेत्यांनी आत्मसमर्पण केल्यामुळे नक्षल संघटनेतून आत्मसमर्पणाचा ओघ मोठ्या प्रमाणात वाढला आहे.
प्रसिद्धी पत्रकात प्रवक्ता अनंत याने सांगितले की, समितीतील इतर सदस्यांपर्यंत संदेश पोहोचवण्यासाठी १ जानेवारी २०२६ पर्यंत वेळ हवा आहे. भूपती आणि चंद्रन्ना यांच्यासारख्या मोठ्या नेत्यांनी शस्त्रे खाली ठेवल्याने
आत्मसमर्पणाशिवाय
पर्याय शिल्लक नाही. १ जानेवारीपर्यंत सर्व प्रक्रिया पूर्ण करून शस्त्रे खाली ठेवण्यात येतील. तसेच, या काळात कोणतीही हिंसा किंवा 'पीएलजीए' सप्ताह पाळला जाणार नाही, असे आश्वासनही त्याने दिले. मात्र, समितीतील ११ सदस्यांनी मुदतपूर्व आत्मसमर्पण केल्याने उर्वरित शिल्लक सदस्य लवकरच शस्त्र खाली ठेवणार, अशी चर्चा आहे.
