धान बोगस घोटाळा बोगस शेतकऱ्यांच्या नावावर ! २८ संचालकांवर गुन्हे दाखल
गोंदिया : शासनाकडून धान उत्पादक शेतकऱ्यांना दिल्या जाणाऱ्या बोनसचा बोगस शेतकऱ्यांच्या नावावर उचल करून देऊन एक कोटी १३ लाख ८६ हजार रुपयांची फसवणूक केल्याचे प्रकरण सालेकसा तालुक्यात उघडकीस आले आहे. या प्रकरणी तीन धान खरेदी संस्थेच्या एकूण २८ संचालकांवर २४ डिसेंबर रोजी फसवणुकीचा गुन्हा दाखल करण्यात आला आहे.
सालेकसा तालुक्यातील मानव बहुउद्देशीय सहकारी
संस्था मर्यादित रामाटोला पांढरी र.जि. १११० केंद्र पाडुडदौना संस्थेचे पदाधिकारी व संचालक मंडळ आरोपी क्र. १ ते ७ यांनी संगनमत करून गटाची नोंदणी अकृषक गटाची नोंदणी मूळ शेतकऱ्याच्या गटांची नोंदणी दुसऱ्या शेतकऱ्यांच्या नावाने नोंदविणे, मूळ शेतकऱ्यांच्या वारसदाराच्या नावाची नोंदणी करणे व अशा प्रकारच्या जमिनीची नोंदणी करून तिसऱ्याच्या खात्यावर प्रोत्साहनपर रक्कम ६३ लाख ७५ हजार २०० रुपयांची उचल करून शासनाची फसवणूक केली. तर सालेकसा सहकारी भात गिरणी संस्था मर्या. सालेकसा र.जि. ११३ केंद्र कोटजभोरा संस्थेचे पदाधिकारी व संचालक मंडळ आरोपी क्र. ८ ते १७ यांनीसुद्धा अशा प्रकारे नोंदणी करुन ३० लाख ५६ हजार ६०० रुपयाची उचल करून शासनाची फसवणूक केली. तसेच शेती साधनसामग्री सहकारी संस्था मर्या. बाम्हणी र.जि. १०९७ केंद्र गिरोला संस्थेचे पदाधिकारी व संचालक मंडळ आरोपी क्र. १८ ते २८ यांनी संगनमत करून अशाच प्रकारे प्रोत्साहनपर राशी १९ लाख ५५ हजार २०० रुपयांची उचल करून शासनाची फसवणूक केली आहे. या तिन्ही संस्थांचे पदाधिकारी व संचालक मंडळ आरोपी क्र. १ ते २८ यांनी शासनाची १ कोटी १३ लाख ८६,००० रुपयांची फसवणूक केली. याप्रकरणी सालेकसा तहसील कार्यालयातील पुरवठा निरीक्षक सतीश मदन डोंगरे यांच्या लेखी तक्रारीवरून सादर केलेला चौकशी अहवालावरून २४ डिसेंबरला सालेकसा पोलिस स्टेशन येथे कलम ३१८ (४), ३१६ (२), ३३६(३),३४० (२), ३(५) भान्यासं अन्वये गुन्हा
दाखल करण्यात आला आहे.
